খন্ধ পরিত্তং সূত্র পালি

খন্ধ পরিত্তং

 নিদানং

সব্বাসীবিসজাতীনং দিব্বমন্তাগদং বিয,

যং নাসেসি বিসং ঘোরং সেসঞ্চাপি পরিস্সযং,

আণক্খেত্তম্হি সব্বত্থ সব্বদা সব্বপাণীনং,

সব্বসোপি বিনাসেতি পরিত্তং তং ভণাম হে।

পরিত্তং

এবং  মে সুতং- একং সমযং ভগবা সাবত্থিযং বিহরতি জেতবনে অনাথ পিণ্ডিকস্স আরামে। তেন খো পন সমযেন সাবত্থিযং অঞ্ঞতরো ভিক্খু অহিনা দট্ঠো  কালকতো হোতি। অথ খো  সম্বহুলা ভিক্খু যেন ভগবা তেনুপসঙ্কমিংসু। উপসঙ্কমিত্বা ভগবন্তং অভিবাদেত্বা একমন্তং নিসীদিংসু। একমন্তং নিসিন্না খো তে ভিক্খু ভগবন্তং এতদবোচুং-“ইধ ভন্তে সাবত্থিযং অঞ্ঞতরো ভিক্খু অহিনা দট্ঠো কালকতো’তি”।

নহি নূন সো ভিক্খবে ভিক্খু চত্তারি অহিরাজকুলানি মেত্তেন চিত্তেন ফরী? সচে হি সো ভিক্খবে ভিক্খু চত্তারি অহিরাজকুলানি মেত্তেন চিত্তেন ফরেয্য, নহি সো ভিক্খবে ভিক্খু, অহিনা দট্ঠো কালং করেয্য; কতমানি চত্তারি অহিরাজকুলানি? বিরূপক্খং অহিরাজকুলং, এরাপথং অহিরাজকুলং, ছব্ব্যাপুত্তং অহিরাজকুলং, কণ্হগোতমকং অহিরাজকুলং। নহি নূন সো ভিক্খবে ভিক্খু ইমানি চত্তারি অহিরাজকুলানি মেত্তেন চিত্তেন ফরী? সচে হি সো ভিক্খবে ভিক্খু ইমানি চত্তারি  অহিরাজকুলানি মেত্তেন চিত্তেন ফরেয্য; নহি সো ভিক্খবে ভিক্খু, অহিনা দট্ঠো কালং  করেয্য। “অনুজানামি ভিক্খবে ইমানি চত্তারি অহিরাজকুলানি মেত্তেন চিত্তেন ফরিতুং, অত্তগুত্তিযা, অত্তরক্খায, অত্তপরিত্তাযাতি”। ইদমবো চ ভগবা, ইদং বত্বান সুগতো অথাপরং এতদবোচ সত্থা-

১।    বিরূপক্খেহি মে মেত্তং, মেত্তং এরাপথেহি মে,

ছব্ব্যাপুত্তেহি মে মেত্তং, মেত্তং কণ্হগোতমকেহি চ।

২।    অপাদকেহি মে মেত্তং, মেত্তং দ্বিপাদকেহি মে,

চতুপ্পদেহি মে মেত্তং, মেত্তং বহুপ্পদেহি মে।

৩।    মা মং অপাদকো হিংসি, মা মং হিংসি দ্বিপাদকো।

মা মং চতুপ্পদো হিংসি, মা মং হিংসি বহুপ্পদো।

৪।    সব্বে  সত্তা সব্বে পাণা সব্বে ভূতা চ কেবলা,

সব্বে ভদ্রানি পসসন্তু মা কিঞ্চি পাপমাগমা।

অপ্পমাণো বুদ্ধো, অপ্পমাণো ধম্মো,  অপ্পমাণো সঙ্ঘো, পমাণবন্তানি সিরিংসপানি অহি-বিচ্ছিকা, সতপদী, উন্ননাভী, সরভূ, মূসিকা। কতা মে রক্খা, কতা মে পরিত্তা। পটিক্কমন্তু ভূতানি সো’হং নমো ভগবতো নমো সত্তন্নং সম্মা সম্বুদ্ধান’ন্তি।

এতেন  সচ্চবজ্জেন সব্ব দুক্খা বিসং বিনস্সন্তু

এতেন সচ্চবজ্জেন ইমং বিসং বিস্সন্তু’তি।