ধজগ্গং সুত্তং ( পালি )

 

ধজগ্গং সুত্তং

 

যস্সানুস্সরণেনা’পি অন্তলিক্খেপি পাণিনো,

পতিট্ঠমধিগচ্ছন্তি ভূমিযং বিয সব্বদা।

সব্বুপদ্দব জালম্হা যক্খ-চোরাদি সম্ভবা,

গণনা ন চ মুত্তানং, পরিত্তং তং ভণাম হে।

 

সুত্তং

এবং মে সুতং—একং সমযং ভগবা সাবত্থিযং বিহরতি জেতবনে অনাথপিণ্ডিকস্স আরামে। তত্র খো ভগবা ভিক্খু আমন্তেসি-‘ভিক্খবো’তি। ভদন্তে’তি তে ভিক্খু ভগবতো পচ্চস্সোসুং। ভগবা এতদবোচ-

 

০১। ভূতপূব্বং ভিক্খবে দেবাসুর সঙ্গামো সমূপব্বুল্হো অহোসি। অথ খো ভিক্খবে! সক্কো দেবানমিন্দো দেবে তাবতিংসে আমন্তেসি- “সচে বো মারিস! দেবানং সংগামগতানং, উপ্পজ্জেয্য ভযং বা ছম্ভিতত্তং বা লোম্হং সো বা, মমেব তম্মিং সমযে ধজগ্গং উল্লোকেয্যাথ। মমং হি বো ধজগ্গং উল্লোকেয্যাথ যং ভবিস্সতি ভযং বা ছম্ভিতত্তং বা লোম্হং সো বা সো পহীযিস্সতি।

০২। নো চে মে ধজগ্গং উল্লোকেয্যাথ, অথ পজাপতিস্স দেবরাজস্স ধজগ্গং উল্লোকেয্যাথ। পজাপতিস্স হি বো দেবরাজস্স ধজগ্গং উল্লোকযতং, যং ভবিস্সতি ভযং বা ছম্ভিতত্তং বা লোম্হং সো বা  সো পহীযিস্সতি।

০৩। নো চে পজাপতিস্স দেবরাজস্স ধজগ্গং উল্লোকেয্যাথ, অথ বরুণস্স দেবরাজস্স ধজগ্গং উল্লোকেয্যাথ। বরুণস্স হি বো দেবরাজস্স ধজগ্গং উল্লোকযতং, যং ভবিস্সতি ভযং বা ছম্ভিতত্তং বা লোম্হং সো বা সো পহীযিস্সতি।

০৪। নো চে বরুণস্স দেবরাজস্স ধজগ্গং ্উল্লোকেয্যাথ, অথ ঈসানস্স দেবরাজস্স ধজগ্গং উল্লোকেয্যাথ। ঈসানস্স হি বো দেবরাজস্স ধজগ্গং উল্লোকযতং, যং ভবিস্সতি ভযং বা ছম্ভিতত্তং বা লোম্হং সো বা সো পহীযিস্সতি।

০৫। তং খো পন ভিক্খবে! সক্কস্স বা দেবানমিন্দস্স ধজগ্গং উল্লোকযতং, পজাপতিস্স বা দেবরাজস্স ধজগ্গং উল্লোকযতং,   বরুণস্স বা দেবরাজস্স ধজগ্গং উল্লোকযতং, ঈসানস্স বা দেবরাজস্স ধজগ্গং উল্লোকযতং, যং ভবিস্সতি ভযং বা ছম্ভিতত্তং বা লোম্হং সো বা সো পহীযেথাপি, নোপি পহীযেথ। তং কিস্স হেতু? সক্কো হি ভিক্খবে! দেবানমিন্দো অবীতরাগো, অবীতদোসো, অবীতমোহো, ভীরু-চ্ছম্ভী, উত্রাসী পলাযী’তি।

০৬ । অহঞ্চ খো ভিক্খবে এবং বদামি-সচে তুম্হাকং ভিক্খবে অরঞ্ঞগতানং বা রুক্খমূলগতানং বা সুঞ্ঞাগারগতানং বা, উপ্পজ্জেয্য ভযং বা ছম্ভিতত্তং বা লোম্হং সো বা মমেব তম্মিং  সমযে অনুস্সরেয্যাথ।–ইতিপি সো  ভগবা  অরহং, সম্মাসম্বুদ্ধো, বিজ্জাচরণসম্পন্নো, সুগতো, লোকবিদূ, অনুত্তরো, পুরিস-দম্ম-সারথি,  সত্থা দেব মনুস্সানং, বুদ্ধো ভগবা’তি। মমং হি বো ভিক্খবে! অনুস্সরতং, যং ভবিস্সতি ভযং বা ছম্ভিতত্তং বা লোম্হং সো বা সো পহীযিস্সতি।

০৭। নো চে মং অনুস্সরেয্যাথ, অথ ধম্মং অনুস্সরেয্যাথ। স্বাক্খাতো ভগবতা ধম্মো, সন্দিট্ঠিকো, অকালিকো, এহিপস্সিকো, ওপনাযিকো, পচ্চত্তং বেদিতব্বো বিঞঞূহী’তি। ধম্মং হি বো ভিক্খবে! অনুস্সরতং, যং ভবিস্সতি ভযং বা ছম্ভিতত্তং বা লোম্হং সো বা সো পহীযিস্সতি।

০৮। নো চে ধম্মং অনুস্সরেয্যাথ, অথ সঙ্ঘং অনুস্সরেয্যাথ। সুপটিপন্নো ভগবতো সাবকসঙ্ঘো, উজুপটিপন্নো ভগবতো সাবকসঙ্ঘো, ঞাযপটিপন্নো ভগবতো সাবকসঙ্ঘো, সমীচিপটিপন্নো ভগবতো সাবকসঙ্ঘো, যদিদং চত্তারি পুরিসযুগানি অট্ঠ পুরিসপুগ্গলা এস ভগবতো সাবকসঙ্ঘো, আহুণেয্যো পাহুণেয্যো, দক্খিণেয্যো, অঞ্জলিকরণীয্যো, অনুত্তরং পুঞ্ঞক্খেত্তং লোকস্সতি। সঙ্ঘং হি বো ভিক্খবে! অনুস্সরতং, যং ভবিস্সতি ভযং বা ছম্ভিতত্তং বা লোম্হং সো বা সো পহীযিস্সতি।

০৯। তং কিস্স হেতু? তথাগতো হি ভিক্খবে অরহং সম্মাসম্বুদ্ধো বীতরাগো, বীতদোসো, বীতমোহো, অভীরু-চ্ছম্ভী, অনুত্রাসী, অপলাযী’তি। ইদমো বো চ ভগবা, ইদং বত্বান সুগতো অথাপরং এতদবো চ সত্থা-

১০।    অরঞ্ঞে রুক্খমূলে বা সুঞ্ঞাগারে বা ভিক্খবো,

অনুস্সরেথ সম্বুদ্ধং, ভযং তুম্হাকং নো সিযা।

 

১১।    নো সে বুদ্ধং সরেয্যাথ, লোকজেট্ঠং নরাসভং,

অথ ধম্মং সরেয্যাথ, নিয্যানিকং সুদেসিতং।

 

১২।    নো সে ধম্মং সরেয্যাথ নিয্যানিকং সুদেসিতং,

অথ সঙ্ঘং সরেয্যাথ, পুঞ্ঞক্খেত্তং অনুত্তরং।

 

১৩।    এবং বুদ্ধং সরন্তানং, ধম্মং সঙ্ঘঞ্চ ভিক্খবো,

ভযং বা সম্ভিতত্তং বা লোম্হং সো ন হেস্সতী’তি।